Ko‘p marketologlar targeting haqida gapirganda bir fikrni takrorlaydi: auditoriya qanchalik tor bo‘lsa, reklama shunchalik aniq ishlaydi. Bu nazariya eski maktabdan qolgan. Hozirgi reklama platformalari boshqacha ishlaydi. Algoritmlar qaror qabul qiladi, test qiladi va o‘rganadi. Siz auditoriyani haddan tashqari tor qilib qo‘ysangiz, algoritmga ishlash uchun joy qoldirmaysiz. Natijada reklama sekinlashadi, ko‘rsatish qimmatlashadi va konversiya chiqmaydi.
Targeting bugun qo‘lda boshqariladigan jarayon emas. Siz algoritmga vazifa berasiz, u esa kim sotib olishini topadi. Auditoriyani ortiqcha cheklash bu jarayonga to‘siq bo‘ladi. Shu sababli “aniq bo‘lsin” degan niyat ko‘pincha teskarisiga ishlaydi.
Tor auditoriya qachon muammo bo‘ladi
Auditoriya juda tor bo‘lsa, reklama tez “charchaydi”. Bir xil odamlar qayta-qayta ko‘rsatiladi. Reach o‘sishi to‘xtaydi. CPM ko‘tariladi. Konversiya narxi beqaror bo‘lib qoladi. Ayniqsa yangi kampaniyalarda bu juda tez seziladi. Algoritmda yetarli signal bo‘lmaydi va u to‘g‘ri optimizatsiya qila olmaydi.
Ko‘p hollarda biznes o‘zini niche deb hisoblaydi. Aslida esa mahsulot yoki xizmat ancha keng auditoriya uchun mos bo‘ladi. Lekin targeting’da ortiqcha qiziqishlar, kasblar, xulq-atvorlar kesib tashlanadi. Natijada reklama ishlashi kerak bo‘lgan odamlar ham tashqarida qolib ketadi.
Real case: tor va keng auditoriya testi
Ko‘plab loyihalarimizda biz bir xil yondashuvni qo‘llaymiz. Birinchi bosqichda tor auditoriya bilan test qilamiz. Aniq yosh, aniq qiziqishlar, ba’zan hatto kasb va joylashuv ham kesiladi. Auditoriya hajmi kichik bo‘ladi. Natija odatda bir xil: dastlab bir-ikki lead chiqadi, keyin CPM oshadi, reklama tez sekinlashadi, lead narxi qimmatlashadi.
Keyin aynan shu kampaniyada ikkinchi variantni ishga tushiramiz. Auditoriyani kengaytiramiz. Yosh oralig‘ini ochamiz, qiziqishlar sonini kamaytiramiz, faqat asosiy signalni qoldiramiz. Natija deyarli har safar yaxshilanadi. CPM pasayadi. Reach oshadi. Eng muhimi, leadlar sifati yomonlashmaydi. Algoritm kim sotib olishini o‘zi topa boshlaydi. Bu farq ayniqsa 7–14 kundan keyin aniq ko‘rinadi.
Keng auditoriya nimani anglatadi
Keng auditoriya bu “hammani qo‘yib yuboramiz” degani emas. Bu algoritmga ishlash uchun maydon berish degani. Asosiy signal bo‘lishi shart. Lekin ortiqcha filtrlash ko‘pincha foydadan ko‘ra zarar keltiradi. Targeting vazifasi odamlarni tanlash emas, algoritmga yo‘l ochish.
Xulosa
Targeting’da auditoriyani haddan tashqari tor qilish ko‘pincha xato. Ayniqsa yangi kampaniyalarda. Avval kengroq auditoriya bilan test qiling, ma’lumot yig‘ilsin, algoritm o‘rgansin. Shundan keyin optimizatsiya qiling. Targeting pichoq emas. Uni kesish uchun emas, o‘sish uchun ishlatish kerak.
